हराही, दिग्घी आ गंगासागर केँ जोड़ला सं बदलत मिथिला

पैघ समय सं ठंडा झोरीमे पड़ल शहरक तीन टा पैघ पोखरि केँ जोड़बाक योजना केँ धरातल पर उतारबाक तैयारी शुरू भऽ गेल अछि। जौँ योजना धरातल पर उतरल तऽ एतुक्का पोखड़िमे समुद्रक नील सन पानि देखबा मे आएत। एहिमे स्वीमिंग क संग नौका विहारक आनंद भेटत। नगर विकास विभाग एकरा संगे कतेको आधुनिक व्यवस्था करबाक योजना बनेलक अछि।

ऐतिहासिक हराही पोखड़िक रकबा 62 बीघा 10 कट्ठा, दिग्घीक 112 बीघा आ गंगासागरक रकबा 78 बीघा 2 कठ्ठा अछि। जौँ योजना पूर्ण भेल तऽ पूरा रकबा 252 बीघा 12 कठ्ठाक भऽ जाएत।

योजना केँ साकार करबा लेल नगर विकास विभाग सीकॉन एजेंसी केँ डीपीआर तैयार करबा लेल अधिकृत केलक अछि। एजेंसी तीनू पोखड़िक सर्वेक्षण केलक अछि। अप्रैलक बाद डीपीआर विभाग केँ सौंप देल जाएत। तीनू पोखड़ि केँ जोड़लाक बाद एक्कर पानि केँ निकालि कऽ गाद केँ साफ कएल जाएत। एकरा बाद एहिमे नील सन पानि देल जाएत। पोखड़ि केँ जोड़बाक ठाम पर फ्लाई ओवरब्रिजक निर्माण होएत। नौका विहारक संगहि, बैसबाक स्थान, मार्निग वाक लेल ट्रैक आदिक योजना अछि।

शहरक महापौरक गौरी पासवानक कहब अछि : 'काज पूरा होएबाक बाद दरभंगा शहर महानगर सन देखाएत। डीपीआर बनेबा लेल एजेंसी स्थलक मुआयना केलक अछि आ बहुतो सुझाव देलक अछि, जेकरा डीपीआर मे जोड़ल जाएत।'